قاموس مصطلحات السجون المصريّة ــــــــــــــــــ قانون تنظيم السجون المصرى وتعديلاته

حاسس انك هاتتسجن قريّب؟؟

حاول تحفَظ المُصطلحات دى ، هاتختصر بضان كتير فى الأسابيع الاُولى

الإستقبال

أبعَد ما يكون عن اللى فى خيالك.. الإستقبال فى السجن بيكون عبارة عن علقة مُحترمة من حوالى 10 أمناء ومخبرين مباحث ، بتاخدها وإنتَ قالع مَلط وبعدها كُلّ حاجتك بتتسرق منّك بدايةً من السجاير وحتّى ملابسك الداخليّة... فى الشتاء أحياناً بتاخُد حمّام إجبارى بخرطوم حنفيّة المطافى ، وفى الصيف بتتكدّر اربع أو خمس ساعات فى الشمس وإنت واقف إنتباه ولو فكّرت تهرش بتلاقى نفسك خَدت 500 قفا وشلّوت من حيث لا تحتسب

الدواعى الأمنيّة
 أى مسجون يشتبه فى كونه يقوم بتهريب أو تعاطى مخدّرات بيقضى 4 أيّام فى غرفة الدواعى الأمنيّة.. حيث الحمّام بدون ستارة ، وهناك من يقوم بفحص فضلاتك بحرص فور نزولها ، وللتأكد من خلوّ معدتك من أىّ أشياء قد تكون ابتلعتها فى وقت سابق بغرض إخفائها يقوم المُخبر بإجبارك على شرب لتر كامل من هذا الخليط (صابون سائل - رماد سجائر - ملح - ماء) حتّى تتقيأ وتُصاب بالإسهال ويتأكدوا من خلوّ جوفك من أىّ ممنوعات

الإيراد

هى غرفة يتم تخزين المسجونين الوافدين فيها إلى أن يتم تدبير أماكن لهُم فى العنابر.. لك الحق فى دخول الحمّام مرّة واحدة يومياً تحت إشراف أحد المسجونين القدامى.. الأكل بيكون مرّتين فى اليوم (رغيفين عيش - قطعة حلاوة - حوالى 3 ملاعق فول مدمس - قطعة جبنة بيضاء)..  فى الإيراد بتنام الساعة 9:00 مساءاً وبتصحَى 6 صباحاً.. لو صحيت لأىّ سبب خلال الوقت اللى المفروض تكون نايم فيه ، أو نمت خلال الوقت اللى المفروض تكون صاحى فيه ممكن تتضرب ، أو تتحرم من التسكين ، أو تروح التأديب أو يتم حجزك فى الدواعى الأمنيّة..

التسكين

هو المكان اللى هاتقضّى فيه فترة العقوبة بتاعتك.. رقم الغُرفة ورقم العَنبر هايبقوا عنوانك

التأديب

لو خالفت أىّ أمر لأىّ سبب هاتروح التأديب
والتأديب عبارة عن غرفة فارغة تماماً مساحتها متر × متر بالضبط ، بتدخُلها بملابسك الداخليّة فقط لو انت محظوظ.. الأرض عبارة عن خليط من الحَصَى والأسمنت.. مافيهاش شبابيك.. مافيهاش حمّام.. بتشرب مرّة واحدة فى اليوم ، وبتاكُل رغيف واحد فى اليوم ، وبتقضى حاجتك على الأرض مكان ما بتنام.. ومابتعملش أىّ حاجة تانية من أىّ نوع.. فى بعض الأماكن لو إتكلّمت وإنتَ فى التأديب بتتحاسب بقضاء يوم زيادة فى التأديب مقابل كُلّ كلمة نطقتها أياً كانت

المخصوص
 مكان إقامة المحكوم عليهم بالإعدام.. وجباتهم بتكون مميّزة نسبياً عن باقى المسجونين ، وغالباً بتكون القيود المفروضة عليهم بخصوص مواعيد النوم والاستيقاظ أقل من المعتاد على إعتبار إنّهم "كده كده ماتوا" والضرب فى الميّت حرام
 

المُصنَّع

هو المسجون الذى يتم تكليفه بمهمّة أو وظيفة فى السجن ، سواء فى المطبخ أو أعمال الصيانة أو المكاتب أو الكانتين........... الخ

المسيَّر

هو المسجنون الذى يتم تكليفه بمراقبة ورصد تحركات باقى المسجونين وصياغتها فى شكل تقارير يوميّة أو نصف يومية وإخطار إدارة السجن بها.. غالباً ما يكون المسيّر مكروهاً من باق السجناء لكونه على علاقة بالضباط والمخبرين الذين يحاولون استمالته طوال الوقت لإخبارهم بأسرار السجناء وفضه لأى مخالفات قد تكون حدثت دون علمهم

التعيين

هو وجبة الطعام اليوميّة التى يقدّمها السجن

الخبز - بمعدل 3 أرغفة للفرد - وقطعة حلاوة يومياً
الجبن الأبيض يومياً
الفول المدمس يومياً ماعدا الجمعة
اللحم أيّام الإثنين والخميس
الأرز يومياً
الخضروات المطبوخة يومياً ماعدا الخميس

الجِراية

هو ما يُطلَق على الخبز فى جميع السجون بمصر ، وحاولت أعرف اختاروا التشبيه ده ليه ماعرفتش

الدُورة

المقصود "دورة المياه" ، لكن الجميع ينطقها بضمّ الدال

النمرة

مساحتك الخاصّة من أرضية الغُرفة والتى يتم قياسها عن طريق "الشبر" وهو حوالى 20 سم و"القَبضة" وهى حوالى 10 سم ، يكون عرضها بين 30 و60 سم وطولها بين 100 و200 سم.. أنشطتك اليوميّة اللى بتتلخّص فى إعداد الطعام وتناوله والشرب والتدخين والصلاة لو بتصلّى والنوم هاتمارسها فى المساحة دى فقط ، وماتسألش إزّاى هاتنام فى المساحة دى.. هاتنام حتّى لو واقف.. ولو اعتديت على مساحة اللى جنبك سواء بقصد أو بدون قصد يبقى لازم تتوقّع الانتقام فى أىّ وقت.. قليل جداً لما تلاقى حد بيسمح أو بيسامح فى الحركة فى مساحته الخاصة

العصفورة

عبارة عن شمّاعة "عمولة" تستخدم لتعليق الملابس والحقائب ، يتم صنعها من قطع الحبال أو شرائط القماش والولاّعات الفارغة

البغبغان

الإسم الحركى للهاتف المحمول

إزازة الميّة

الإسم الحركى لبطارية الهاتف المحمول

واحدة من الداخل

الجريمة التى تحدث داخل السجن من طرف أحد المسجونين ويتم محاسبته  مم يجعل فترة سجنه تمتد بعد إضافة العقوبة الجديدة للعقوبة الحالية

واحدة عَ الضيّق

الجريمة التى تحدث داخل السجن وينجح المسجونين فى تغطية آثارها أو منعها قبل أن تعرف إدارة السجن بشأنها

مرزمل

كلمة غريبة اُخرى لا أعرف أوّل من استخدمها ولماذا ، لكنّها تعنى: الهادىء - العاقل - الرزين ، حسب موقعها فى الجملة

حِرز - حِرز مكَمكِم

ليس المقصود هنا هو حرز القضيّة أو حيازة شىء ممنوع.. ولكن هى كلمة يطلقها السجناء فيم بينهم على المسجون الغبى أو من يُحدِث الكثير من المشاكل والذى يمثل هماً على باقى المسجونين

أوّل حكّة

تُطلَق على المسجون لأوّل مرة ، غالباً لإلتماس الأعذار له إن أخطأ أثناء تعاملاته مع مسجون آخر

مَلَكى

تُطلَق على المسجون المثقّف أو المتعلّم ، ويقصدون بها أن مكانُه ليس السجن

حَبْسَة عبيطة

تُطلَق على أحكام السجن التى لا تتجاوز 12 شهر ، بغرض التقليل من أهميّتها

دَكَن - دَكَل

توتّر الجو العام والمشكلات المتواصلة ، والكلمة أصلها "دجَل" تقريباً

الخابور

شُعلة صغيرة تتم صناعتها بواسطة شرائط القماش والأكياس البلاستيكية والزيت ، وتُستخدم لإعداد الشاى فى الزجاجات البلاستيكيّة فى حال عدم توافر غلاَّيات أو مواقد كهربائيّة - مخالف للوائح أغلب السجون ويتم عقاب مستخدمه وصانعه

النضّارة

فتحة فى الباب الحديدى للغُرفة ، تستخدم للتواصُل فى حال عدم رغبة السجّان فى فتح باب الغُرفة

التريُّض

ساحة التمشية وممارسة الرياضة للسجناء

الطُرَّة

استخدام الفوط أو الملاءات للضرب على سبيل المزاح - مخالفة للوائح جميع السجون ويتم عقاب مستخدمها وصانعها

المراية

الحائط المواجه لباب الغُرفة ، ويُعَد أكثر الأماكن راحة وتميزاً نظراً لكونه مغلق من ثلاث جهات ولا يمر عبره إلا صاحبه فقط ، ويحتلّه غالباً أقدَم السجناء

المصلَب

مكان آخر مُميّز ومتّسع نسبياً ويكون غالباً فى أحد أركان الغُرفة أو بجوار "المراية" ـ

الطيّارة

الحائط العريض بجوار نافذة الغُرفة فى بعض السجون ، مكان مميز جداً وجيّد التهوية وغالباً لا يتّسع سوى لفرد واحد ، يكون هذا الفرد إمّا أكثر النزلاء شهرة أو سطوة أو مالاً

التابوت

سرير مُعلّق يصنع بواسطة الحبال ، بالرغم من كونه يضمن بعض الإستقلال والخصوصية لصاحبه إلا أنه غير صحّى بالمرّة لصعوبة تنظيفه ولحجبه الهواء والضوء عن من هُم بأسفله

الفِرَغ

هى "فوارغ" أو عبوّات بلاستيكيّة تستخدم لحفظ الطعام أو المتعلّقات الشخصية

الترقية
انتقال المسجون من "نمرة" إلى اُخرى متميّزة أو أكثر راحة

النَصْلة

سلاح أبيض تتم صناعته من أىّ قطعة معدنيّة أو البلاستيك القوى بعد إعادة تشكيله وجعله حاد

الفراولة

الإسم الحركى لحبوب مُخدّر السيكوتال والتى-دول والكونترمال ، والإسم نسبة للون الحبوب الأحمر

الصرصار - الصراصير
الإسم الحركى لمُخدّر الباركينول ، هو أصلاً علاج للشلل الرعاش وتناوله يسبب غياب الوعى والهلاوس البصريّة

أبو صليبة
الإسم الحركى لمُخدّر الرهبانول ، والإسم نسبة لعلامة + المحفورة على الحبوب

الخشبة - أبو شَرطة
الإسم الحركى لمُخدّر الألترادول

السِبسَة

المقصود بها السيجارة ، المصطلح غير شائع بس ممكن تقابله فى سجون وجه بحرى
والسيجارة هى العُملة المتداولة داخل السجن ، عن طريقها ممكن تشترى أىّ شىء ، وأحياناً أىّ حد.. لذلك هاتلاحظ إن فيه ناس غير مُدخنين بس دايماً معاهم سجاير كتير

الأمبول

هو عبارة عن غشاء بلاستيكى صغير مُحكَم الغلق ، يستخدم لتغليف المخدّرات وأحياناً النقود أو الأسلحة قبل بلعها أو إدخالها فى فتحة الشرج بغرض إخفاءها وتهريبها ، ويقوم بعض المهرّبين ذوى الخبرة برَبط الأمبول إلى أحد ضروسهم بخيط قوى قبل البلع حتّى يظل معلقاً ولا يصل للمعدة لضمان سلامته وسهولة استخراجه فيم بعد

الكَعب

وحدة لقياس المشروبات ، تُقدّر بإرتفاع عقلة الإصبع أو أكثر قليلاً

إفراج بوابة

خروج المسجون بعد انقضاء فترة العقوبة من السجن إلى منزله مباشرةً دون المرور على قسم الشرطة أو مديريّة الأمن ، وهو أمر نادر الحدوث

ملحوظة: وارد تختلف بعض المسمّيات من سجن للتانى أو من مُحافظة للتانية
 _________________________________________________

نصائح وإرشادات


إيّاك تعقد صداقات داخل السجن وبالذات مع المسجونين فى قضايا جرائم النَفس والسرقة والمخدّرات ، وإذا لقيت نفسك مضطر تعمل كده إيّاك تقول أى بيانات أو معلومات حقيقية عن نفسك

حاول تخلق شخصيّة افتراضية وتتقمصها طول فترة وجودك داخل السجن وحاول ماتنساش أىّ تفاصيل أو تتلخبط وتقول كلام متناقض


إشغل نفسك دائماً بأىّ حاجة وحاول ماتراقبش اللى حواليك ، بالذات لو إنت مع ناس أقدم منّك
تجنّب النظرات المُباشرة بقدر الإمكان

حاول يكون ليك دور ويحسّوا إنك مُفيد ليهم ومش من مصلحتهم يخسروك أو يضايقوك
ساعدهم فى كتابة الخطابات للأهالى ومُراجعة طلباتهم
فرّق علبة سجاير أو اتنين عليهم مع كُل زيارة

ماتطلبش مساعدة من حد وماتعرضش مساعدة على حد بقدر الإمكان

لو قدرت تشتغل فى السجن يبقى كويس جداً
هاتقدر تتحرّك بحريّة أكتر
هاتلاقى أكل أحسن وعلاج أحسن
وهايبقى فيه مع الوقت نوع من المودّة والثقة المُتبادلة بينك وبين إدارة السجن

يفضّل إنك بمجرد وصولك للسجن تبدأ تقول لهم على طبيعة عملك وعلى أى حرفة أو مهنة ممكن يستفيدوا منّك فى آدائها أثناء فترة عقوبتك

قبل ما تدفع أىّ حاجة لأىّ حد إتأكد من سعرها أولاً ، والتأكد من السعر يستحسن عن طريق مراقبة البائع والمُشترى وبعد كده التعامل مع البائع مباشرةً وبوجود شهود وبدون وسطاء


عدّ سجايرك وبوناتك قبل ما تنام وماتسيبهمش بعيد عنّك ، لو اتسرقوا ماحدّش هايجيب حقّك


ماتتخانقش أبداً قبل ما تعرف الخناقة دى هاتخلص إزّاى ، لأن وارد جداً تنام ماتقومش تانى سواء نتيجة ذبحك أثناء النوم أو وضع السم فى الأكل


تقريباً كُلّ السجون بيحصل فيها اعتداءات جنسيّة ، فى حال رصدك لأى موقف مُشابه إمتنع عن الشهادة حرصاً على سلامتك.. أمّا لو حسّيت إنك هاتكون الضحيّة ، ف الحل الأمثَل هو إنّك تخلع منّه بهدوء وتنتظر ظهور أول ضابط مباحث وتطلب تحرير محضر رسمى ، وماتطلبش شهود بنفسك ، لو حد عايز يشهد معاك هايقول من نفسه إنّه شاهد.. طلبك للشهود من نفسك ممكن يوقعك فى مشاكل أضخم

فى حال طلبك للشهادة على أى واقعة ، ماتقولش إنّك كُنت نايم أو فى الحمّام عشان بقت حجة قديمة ومُستهلكة
 قول إنك كنت بتكلّم اللى جنبك وفجأة لقيت اللى حصل حصل وماتعرفش الموضوع بدأ إزاى
 ولو حسيت إنك مش هاتعرف تعمل كده يبقى يستحسن تعمل نفسك نايم فعلاً وتصبر لمّا أفراد المباحث يوصلوا وساعتها إعمل نفسك بتحاول تصحى وخلّيهُم ياخدوا بالهُم بس من غير ما تعيش فى الدور أوى يعنى
ممكن تسأل اللى جنبك بذهول وتقول له: هوّ إيه اللى حصل؟؟
وحاول يكون اللى جنبك ذكى وليه مصلحة عندك

حاول ماتتلخبطش فى رُتَب الضبّاط عشان الموضوع ده بيعصّبهم
لو مش متأكّد من رُتبة الضابط قول له "يافندم" وخلاص
بلاش "باشا" و"بيه" عشان ماتسيبش إنطباع عنده إنّك زىّ الباقى

ماتتمسكِنش أبداً وإنتَ بتشتكى
وإعرف حقوقك كويّس عن طريق مراجعة

إقرأ أيضاً
قانون السجون المصرى بين الواقع النظرى والتطبيق العملى